Mac OS App - Remember The Milk

用RTM之前,其實我係用Todoit先,後來無意中發覺咗RTM,更加好用,最主要原因係,我係個Keybroad控,如果可以打Shortcut Key,我都會盡量用Keybroad,RTM可以咁樣打: "買洗衣粉^1715!3#home" ,所有嘢用打既,已經可以入加咗個項目,即係嚟緊既下午5點15分買洗衣粉,屬於屋企既事項,只係排第3重要....反而Todoit,我之前打完買洗衣粉,就要揀日期時間,然後揀要放邊條List,再揀第幾重要.

對我嚟講,因為太冇記性,年幾前開始,阿媽大咗肚,成日叫我做乜做物,我都唔記得,然後自己想要點點點又唔記得,後來發現原來呢個世界,可以用手機既To Do List提醒自己做乜做物,如果我寫落本實體紙既Note入面,其實都係會唔記得.

Remember The Milk個同步,都係做得好好,基本上都係零時濟,個Mac App都係做得好爽快,唔會慢,呢個我都係會長駐喺部Mac,提醒我既小工具.

海水洗潔劑

星期日洗廁所,真係頂唔順啲清潔劑,個鼻已經唔妥,然後遲早16歲半,就有主婦手.

咁我就走去搵吓有咩有機清潔劑啦,買咗盒斧頭牌蘇打粉,雖然網上個個都話得,但我唔知點解,用起上嚟,又真係唔係太得,但又未去到完全零功效,只係欠些少效率.然後尋日去買健康食品嗰時,無意中喺間鋪入面,發現咗隻,台灣叫「美好人生-多功能海水洗潔劑」既嘢,話係有機,洗衫洗疏果都得,見佢大大盒都係$6x,好似平過買洗衣粉咁.

開出嚟,應該似係洗衣粉,咁都冇所謂既,我將佢加埋啲蘇打粉,撈埋開水,依,似乎...又真係好好多Wor...當然對付油份高既碗碗碟碟,都係要再加少少醋,連埋熱水,去油效果就好好多...呢個禮拜試埋洗廚房,睇吓加少少鹽,係咪可以增加磨擦力,再容易少少刷走污跡先.

Mac OS App - Toggl

我部Mac未鏟既App,除咗尋日介紹既Magnet外,仲有長駐呢隻時間Toggl (https://support.toggl.com/),唔知你有冇用過蕃茄鐘,如果冇,係好事,證明你係個專心既人,呢隻Toggl,唔單止可以做蕃茄鐘,如果你係記錄控,仲可以幫你,記低做過啲乜,每樣嘢用咗幾多時間.

看似都係好簡單既功能,不過我深信,App呢樣嘢,功能唔駛多,做得好,穩定,自然會留到客,好似Toggl既同步,係我用過咁多唔同既蕃茄鐘做得最好既一個App,基本上電腦端,手機,平版個時間係完全同步,好多其他呢類App,就算話有同步,都係有好大誤差既同步,至於跨平台使用呢隻App,就可以方便我呢啲周圍做功課既人囉.

價錢我覺得係真心貴,最平Plan每個月已經USD$10,點解咁貴,婆仔都肯比錢呢,其實之前USD$99買斷,而家變月費,不過咁貴都買,係因為電腦版有個好正既功能,就係佢見我好耐都冇做過嘢既時候,佢會彈個Window出嚟叫我繼續做,唔專心既我,而家可以做足4次25分鐘功課先開手機睇.

Mac OS App - Magnet

搬咗返舊屋一排,終於可以有少少時間執吓嘢...執到咁上下,尋晚訓唔著,又執吓部電腦啲App,不過之前Downlowd得太多,所以尋晚就係咁鏟鏟鏟,而家鏟剩既App,係我自己都覺得幾好用既App.

最常用既App我首推呢隻,Magnet (http://magnet.crowdcafe.com/),主要係當我開住好多唔同既軟件,我需要將唔同既軟件整齊咁放好既話,只要用Control-Option,配合上下左右,U,IJ,K同Enter,就可以將唔同既軟件/視窗,妥善咁放喺上半下半左半右半左上右上左下右下同埋全螢幕,如果開Chrome做功課,拆散唔同既分頁,一邊用嚟搵資料,一邊用嚟做功課,一邊用嚟傾Whatsapp,真係好方便,當然你亦都可以慳返$8蚊港紙,次次用手較返合適既位置.

婆仔湊仔。2句

老豆間鋪,呢個星期好返啲,問佢點解,佢話都唔知點解,不過佢覺得可以請多個PT,阿媽其實唔駛咁辛苦2頭撲,上星期我又整親腳,所以老豆就大大條道理,比佢偷雞又請多半個人.咁上星期叫做比我抖吓.

---------------

尋日星期日,同班親戚食飯,呢次去金鐘太古廣場,食到咁上下,細佬要飲奶,咁我梗係去埋幫手換片,費事對住班3姑6婆.不過呢度等換片,真係惡夢,一來大人廁所入面,冇換片板,二來佢啲BB廁所相距好遠,而佢個BB廁所唔係而家流行既共用設計,即係一大個BB廁入面,包曬換片同換奶既位,咁會點呢?

我阿媽抱住細佬同我等咗10分鐘,我見唔對路,就再搵其他BB廁,咁我上面嗰層,都有2個B排緊隊,咁我就落返去啦,來回起碼都有5分鐘,咁又再等多10分鐘,先到我地,即係等咗20分鐘.

好啦,咁我幫手換片,阿媽準備餵奶,前後都未夠3分鐘,有人拉門,越拉越大力,咁我就話有人,之後我諗大約10分鐘左右,出面個人又再大力咁拉門,就要真係有用力咁,搞到細佬分曬心咁睇吓發生咩事,咁我咪行去個門邊,大聲少少話:「餵緊奶啊,唔該等多陣.」好啦,搞到細佬都冇Mood飲,咁咪準備收檔囉,點知出面個男人同佢老婆講:都唔知係咪喺入面食煙,咁耐.

之後搞掂,我抱住細佬,開門嗰時,我忍唔住同個男人講:我頭先都等咗起碼20分鐘,但我冇估人地喺入面食煙,因為我諗到人地小朋友要食奶,你咁用力拉對門,你知唔知會騷擾到啲BB.

講完我就行,點知行2部我聽到佢地講:嘩,咁後生做媽咪.

屌,真係咩人嚟㗎,仆街.

---------------

下晝返到屋企,阿媽餵細佬順便同佢訓,咁我咪搵家務做:洗廁所,洗浴缸,洗細佬個浴缸,洗細佬啲衫,洗蒸奶樽器,咁就由天光洗到天黑.

呢輪細佬啲衫真係好難洗,以下係難洗既次序,最難洗既排最頭:
屎>香蕉>飯>火龍果

最衰小朋友衫只可手洗,好掛住以前部洗衣機,開勁熱既水洗一定好乾淨,尋日開熱水洗,但因為我都怕熱,所以又唔可以開得好熱,我對婆仔手就爛,結果啲香蕉膠實曬,好難洗.

---------------

上星期屎忽癢,走去買咗塊小朋友廁板比細佬,尋晚見得閒,第1次放佢落去,然後同佢Um..Um...,坐咗3分鐘,開始見佢肚仔用力痾,之後就3條便便,好開心啊...

希望佢唔會新屎坑3日香啦.

婆仔去晨運

今日見條腿好啲,朝早去咗跑步.
我諗住呢個星期都會晨操...不過路線會日日唔同,當比自己了解吓港島都好.

太耐冇開Runkeeper,跑到一半先知未開,由屋企跑跑跑...跑到1/3個馬場除外套先知外開Runkeeper,之後就跑返海旁返...呢條路線其實都幾好.然後跑到一條隧道,我見有2個露宿者訓緊,忍唔住走去茶記買咗2份放低佢地旁邊,希望佢地有食啦.

唔認婆仔都唔得

越嚟越發覺,自己好似個婆仔,啱啱整親條玉腿,轉頭又作感冒,唔讚吓自己老都唔得.

可能前日做物理治療嗰時,初先啱啱坐低又勁熱,除曬校摟冷衫,就咁得條校裙,到我成隻腳插曬機做電療嗰時,坐足半個鐘吹足咁耐冷氣,又冇冚被,先知賴嘢,嗰晚已經有少少嚟料,做完物理治療落街等老豆車,企喺條街度已經好似暈暈地,返到屋企,因為敷咗藥,想沖個熱水涼又唔得,食完飯唯有包到自己成隻粽咁,上床訓覺覺豬就算,訓到半夜有一吓熱醒咗,成身汗,我諗可能焗咗身汗應該好返,同埋個人冇咁凍,點知尋日返學都係唔掂,都係要舉手投降請假走人,返到屋企又昏迷咗幾個鐘,然後起身浸浴缸,開到啲水勁熱浸落去,浸到成個人紅曬,但手手腳腳都係咁起曬雞皮,阿婆呢鋪真係唔掂鳥,浸住熱水都覺得凍,16年嚟我諗都真係未試過.

講開婆仔,頭先食飯,行過街邊檔,見到有條運動褲,先$15蚊,2條仲有得平$5,咁就買咗2條,自從老豆生意唔掂既時候,我就一路諗住要慳,點知呢輪係咁發神經,買衫仔褲仔都買咗差唔多$200,買件冷衫又差唔多$200,就算呢個唔計,因為呢幾樣嘢,係想著比自己鐘意既人睇既,不過過年前又買咗條Legging,而家開始,我都係買返街邊幾廿蚊貨仔既衫算數,如果唔係婆仔真係臨老唔過得世啊.

《 欠債要靠賭博來還 》

上星期整親隻腳,做物理治療嗰時,識咗隔離床位,又係同一日整親既警察哥哥,同佢吹咗一陣,其實都幾尷尬,2條友插到成身都係線,喺度電緊,佢就電背,我就電腳,然後無啦啦可以咁樣傾咗好耐計,最搞笑係條友,係咁講到自己有幾衰,屋企有個老婆,但又會出夜總會滾,我睇佢個樣應該未夠25歲,又冇戴結婚介子,之後又話自己係咁賭錢,賭到冇曬錢要個老婆出去做樓面搵錢,我心諗,第1日識我呢個靚妹,唔駛咁坦白下話!?況且警察賭錢唔應該周圍同人講囉,然後佢就拎部電話比我睇,話有隻Game叫《 欠債要靠賭博來還 》,佢講緊隻Game,真係玩嘢,結果我又DL落嚟玩埋一份,10分鐘唔駛輸淨條底褲...

真係唔好賭錢,哈哈.

休養

整親腳之後,最大既好處係,唔駛湊住細佬,阿媽要留返喺屋企,唔落得鋪頭,除咗頭2日係咁食止痛藥,由朝到晚都係咁訓訓訓之外,星期日開始回魂之後,我就係咁追返啲功課溫返未溫既書,上星期太過唔專心.

湊細佬實在用曬我所有時間,而家得閒到,仲可以嘆返本「我在雨中等你The Art of Racing in the Rain」,然後再自己靜靜地,用個腦跳舞,好似呢排要狂執自己既piqué,tombé,我永遠都係太大力伸過龍,成日落錯位,縮又縮唔曬,好似呢個動作,其實好靠用個腦去運作,平時落堂返到屋企,上堂所有嘢都比返Miss,而家有少少空間可以坐低,用個腦去做返啲動作出嚟,將隻腳推出去,大步大步跨出去,收返,收返,收返,收返,收返,收返,收返,收返....

用個腦跳舞有個唔好處,就係訓咗都唔知,尋晚4點幾先紮醒,諗諗吓我連牙都未刷.

繼續[廢青Mode]

真係唔明,點解呢輪成日都要同個好難頂既親戚食飯,即係之前成日話啲後生廢既,唔捱得,然後前排放年假去澳洲,比班小朋友自己喺個泳池玩差啲浸親2個小朋友嗰個.

話說小妹,上星期整親隻腳,佢又喺度多多意見,之前佢已經係咁喺度成日話我唔識湊細佬,又乜又物,好啦,到今日,無啦啦食食吓飯,又喺度自己同自己講嘢:唉,而家真係要學習點同啲後生溝通,同親佢地講,係呢,得呢,真既呢,點知樣樣都唔會聽,好似前排Ja ma,我同事咳到死死吓,我叫佢飲果皮水,死都唔信,唉,尤得佢囉,咪咳足咁耐都唔好.

講意見,我當你全部都啱,全部都係好既意見,你仲要學識說服,你講完冇說服到人,咁無計Wor,況且你都係比吓意見姐,如果我真係要聽,身邊有咁多三姑六婆,上網又一大堆唔同既說法,你真係要迎合曬所有意見,聽曬人地講,我諗你會癡線.

主觀既人覺得自己嗰套放落全世界既人身上都冇問題,廢青唔係,廢青如我,我覺得適合我既,未必適合人地.

以上.

婆仔儲錢

呢個星期,日日都有人講,點點點慳慳埋埋,平日就洗屋企錢,洗男朋友錢,乜乜乜,我而家未真係出嚟賺錢,講買樓實在太過搖不可及,不過中期目標,我有2個願望,好想達成,第1個就係考完DSE後,要自己去1個月歐洲旅行,第2個願望就係,夠18歲即刻去學1,2同3號牌.

現時儲既錢,超過7成都係靠中學開始老豆比既零用,其餘大約1成就係每年既利是錢,其餘唔夠20%就係久唔久學跳舞嗰度,有少少平面廣告射比我既外快.

對於儲錢,我好保守,但又會計吓啲婆乸數,即係就咁放銀行,啲息低到乜,所以大部份錢,我都會做定期,只不過,我又驚死自己忽然需要錢,如果綁死一份定期,其實都巧驚驚,所以我就會分開,由最初嗰份做1年既定期,到做2份定期,但每半年Renew一次,慢慢儲儲吓,就每季1份,Keep住做3個月,意思即係我每三個月,就可以有份定期到期,有事可以拎出嚟用,升上Form4之後,我而家已經盡展到做緊12份定期,每份都係做返1年,即係每個月有咩事 ,我都有舊錢可以用得...我好明白我老豆三更貧五更富,細個已經經歷過1次差唔多破產,所以我成日都要有舊錢防身,驚老豆老母走佬我都可以照顧到自己.....講笑.

至於久唔久影平面廣告既收入,因為大概就係一手2800咁上下,多除少補,我每次都買一手,我呢啲婆仔,從來都胸冇大字,完全冇諗買樓既問題,講真,買唔到咪租囉,租唔到間屋,租間房,我覺得唔駛死既,另外就係,將來排公屋一定要排,啲不吃人間煙火既有錢人,話班大學生走去排公屋,講到好似人地好有問題,癡撚線啦,張綠表可以買二手居屋㗎嘛,搵嘢嚟屌.

做錯就認

呢2日做錯咗啲嘢,我未知係叫好事,定唔好,不過總之都係比屋企人發現咗.

從細到大,我永遠都諗住,做錯事,會設法隱瞞,爹地媽咪係唔會知道,但次次都會比佢地發現到.

我唔想有人因為我唔開心

訂咗既衫仔褲仔,終於到啦,本來諗住之前可以著住過情人節,不過而家我既一個決定,阿邊個冇機會見到啦...我唔多唔少,都有啲唔開心,好失落...

我唔想有人因為我唔開心,我唔係因為有第二個所以要分手啊,我真係唔想再拍拖,想讀好啲書...

我好想發洩啊...好想好想好想發洩吓,比我曳曳幾日好嗎?

籌錢比呢2位警察應該冇爭議

「將軍澳警署ㄧ名軍裝警員，在當值期間突然感覺腳部痛楚，往醫院診斷後被懷疑肌肉發炎，獲處方藥物出院。豈料回家後發高燒，家人將他送往將軍澳醫院，經詳細檢驗，懷疑腳部被食肉菌感染，隨即進行截肢保命，惜事與願違，延至翌晨不治。」

其實與其籌錢比嗰7個犯咗法既警察,不如籌錢比呢個警察既屋企人啦,另外我仲記得嗰時佔中有個警察感冒,比人逼住返工,然後昏迷到家未醒,呢啲警察你話籌錢,我又覺得好正常.

對唔住

情人節放學嗰日,放學之後阿邊個送我返屋企,然後返到炮台山地鐵站,因為想拖住多一陣,原本由月台上出閘嗰層,係搭扶手電梯上去,我地2個屎忽癢走去行樓梯上去,行到腳都軟埋,不過嗰日我終於錫到阿邊個,哈哈...

條樓梯完全冇人行,我地坐咗陣,傾咗陣計,我諗10分鐘左右,都冇人行過.同埋因為阿邊個高我成個頭,企樓梯錫錫,我企高一級,阿邊個就唔駛彎腰就我,好正既地方.

嗰日我拎咗阿邊個既初吻,哈哈,完全唔明,點解可以拍幾個月拖,都冇錫過,同乖乖仔拍拖,有好有唔好啦,佢真係唔識錫錫囉,但咁耐以嚟,呢淡既Sweet程度,真係入到頭5位,然後就係我唔明點解錫錫,個男仔已經有反應...

希望佢可以好好咁記住呢個Kiss啦,我實在頂唔順嗰種冇自信既小男生了,多謝你陪我,經歷屋企第2次差啲破產既時間,其實唔計你煩既嘢,我覺得呢個男仔,都係可以慢慢拍長拖既男仔,不過我真係想好好咁,照顧細佬同埋專心讀好啲書.

原諒我用分手,嚟紀念我地第99日拍拖,我,都真係唔想再拖,我唔係個鐘意拖既人,我諗我真係唔適合你,對唔住.

寄禮物比工人姐姐個仔

因為老豆鋪頭生意唔好,做咗幾年既工人姐姐,比我地炒咗返咗菲律賓,好嗰方面睇,佢老公其實好想佢返去,唔想佢留喺香港做嘢,不過因為我老豆闊佬(亦因為咁盤生意做唔掂),不嬲都比多成倍人工姐姐,所以嗰時姐姐點都想繼續做落去.

自從上年年尾,姐姐返去之後,聖誕節同姐姐生日,我都買好多嘢,寄去比佢,然後好快又到佢個細仔生日,我又係咁買咗好多衫啊,朱古力啊,文具啊,玩具啊之類,買咗幾公斤嘢比佢個仔,可能始終覺得好似影響咗佢地成家咁,我成日都好想補償佢地.

希望姐姐返去之後,真係可以好開心咁生活啦.

BTW,嗰時聽姐姐講,香港中環環球大廈,有好多存倉既服務,即係可以幫佢地,連續儲住啲嘢幾個月,中間可以再不斷咁加嘢入去,然後最後可以再幫佢地寄返去菲律賓,幾公斤嘢每個月已經要百幾蚊,貴過曬其他所有迷你倉,真係生意既嘢,你諗到你咁膽做,就可以搵到錢.

比啲所謂大人激死

上星期日食親戚飯,講真,真係食唔落,一開波又講,又有中學生跳樓,然後又偉論:而家啲後生仔真係唔捱得,讀書讀唔掂未算囉,出嚟做嘢囉,唔駛死既...BlaBlaBla...

好啦,之後就開始分享,呢個農曆新年假,同幾個Family去澳洲既經歷啦,然後講到佢地間Resort有私人泳池,8日入面有2個小朋友(4歲,8歲)喺冇大人睇住既情況下浸親,之後仲要讚自己個仔(Form1),2次都係佢救返,然後又感恩BlaBlaBla,講耶穌....

仆街,搵個大人睇住班小朋友啦,冇腦既,最大嗰個都係Form1,你要我而家16歲睇住5個小朋友,都唔掂啦,癡線,冇事就講感恩,完全唔會反省吓自己有冇責任,仲要係第1日已經浸親1個,班大人都唔會喺之後既時間,認真地睇住班小朋友.

好啦,我就係咁餵緊細佬食嘢,佢個細仔就係咁行過嚟,拎細佬啲嘢食,擺完落嘴,賴完啲食物又吐返喺細佬張餐檯,我又唔好意思話人個仔,你個仔唔食嘢,你鐘意放任既教法,OK～～,但你個仔搞住人地個小朋友食嘢,又係咪應該出手理吓呢,講緊仲要係衛生既問題啊.

都算,呢個仆街親戚仲要串多句:細路仔唔駛由朝到晚咁緊張既,Zoe,你快啲食野吧啦...

我頂~~你個仔唔搞住細佬,我駛鬼餵咩,佢本來就可以自己拎住啲菜啊瓜啊食食食,你次次同你食飯你個仔搞住曬,搶佢手上面既嘢食,我先要帶粥仔餵,而家仲喺度串.

情人節好開心..冇鬧交

情人節,最後,過得好開心...因為放學嗰時阿邊個送我返屋企,成程車都冇話我.我尋晚好坦白咁同阿邊個講,再係咁樣落去,復活節都未必過到.

我條校服裙改短,因為我覺得靚啲,況且我行路行得好斯文,坐低會夾腳,再翹腳,我唔會外八咁坐,有風我會㩒住條裙,靚係我自己覺得,同有冇男仔睇,係冇關係;

我同我啲Friend出街既話,我有時都只係翹住隻手,我從來冇諗我翹人隻手,等於鐘意第二個,或者同人拍拖,更加唔會無啦啦去諗,個胸掂到個Friend隻手,真係好小學雞,好得閒先會諗咁多呢啲無謂嘢,有時間溫吓書好過啦;

跳舞我更加冇嘢好講,我學跳舞學咗都十幾年,練舞排舞嗰時著乜,真係好求其,同埋因為通常都有好多伸展動作,衣著方面越簡單越好,底衫唔著就梗㗎嘞,因為一著,一定會走咗上去,然後成日都要扯返落嚟,除咗嗰幾日唔方便之外,尤其是冬天,底褲都唔會著,一件舞衣>襪褲>裙仔就算,如果唔係去親廁所,就要由頭除到落腳,凍到飛起,如果舞衣>襪褲>裙仔,一坐低拉開小小件舞衣,去得,你知唔知好多時,排舞排到最後,次次都急到賴,坐低就去得廁所知唔知幾咁重要,同埋冬天真係好Q凍,十幾度除曬衫去完廁所,粒釘我都唔知會飛咗去邊啊,又再況且,舞衣同泳衣咪一鬼樣,我完全唔明阿邊個日哦夜哦哦乜春.

其實嚟嚟去去,都都係為呢啲野喺度煩,我真係攰嘞,返完學就返去湊細佬,搞掂佢就要做功課溫書,我十幾年冇讀過書,我想追返吓啲程度,真係唔好嘥我時間,本小姐啲時間用嚟談情說愛,唔係小學雞喺度鬧交.

備份再備份備份再備份

Whatsapp上星期有咗雙重認證功能後,我即刻開,然後再拿拿臨入返個Email,確保自己用電話號碼,同Email都可以拎得返個Whatsapp.

上年12月嗰次,真係太傷啦,之前用儲值卡,跌咗部電話之後,電話公司話幫唔到我要返個號碼,從嗰次之後,我好明白電子用品真係要小心使用,跌咗可以咩Acc都冇曬,而家咩Line啊,Evernote啊,Gmail啊,乜春密碼都係備份再備份,不過我相信,到最後,我又會一次過唔見曬所有密碼....哈。哈。哈。哈。哈。哈。哈。哈。哈。哈。哈。哈。哈。哈。哈。哈。哈。哈。

就嚟情人節,不過唔知過唔過到

就嚟情人節,不過唔知過唔過到.

呢個星期,日日都為到啲小事唔開心,我冇諗過,我5月去表演,因為同團有男仔,咁都可以呻醋,係咪傻㗎,我冇諗過1個好錫我個既人,可以專制到咁,我跳舞,真係只係好專心表演,我相信同團既每一個人,記呢樣記嗰樣,都唔會得閒搞咩嘢,我著咩衫排舞,又關阿邊個事,個團有咩人有幾多個男仔,又關阿邊個事,個男仔有冇望我,又關阿邊個事,個表演點解會有男仔,又關阿邊個事,排緊隻舞,有冇身體接觸,又關阿邊個事,點解唔可以排到掂唔到,又關阿邊個事,其實係咪傻㗎.

本來可以去沖繩表演,我覺得真係一件好開心既事,而家就引致阿邊個,日日喺度唔開心;本來我要問屋企比唔比佢,問學校可唔可以請假,然後仲要應付考試,好多正經嘢要擔心,結果我而家要喺度擔心阿邊個啲無謂嘢.

講真,我一路覺得,應該話,一路以為,同個純品少少既拍吓拖,真係可以好好享受愛情呢樣嘢,但呢刻,我完全唔享受.

企直

尋晚無意中開著電視,原來做緊嗰套無線劇有少少劇情係講芭蕾舞,然後有一Part,講個人要企直,只可以講,我跟過幾個Miss,都係教我,用單槓掛住個人,全身放鬆,用地心吸力感覺咩叫垂直,劇入面叫佢企喺度感覺,我覺得比較難,未搵到咩叫垂直,好難叫個身體企直,當然,學「企直」係第1步,當你用單槓搵到咩叫垂直,就要幻想住個身體,係個一路想向上升,充滿氫氣既氣球,只係有1條線扯住你,叫地心吸力.

不過即使個重心未需要郁,但已經好難,1個人有幾個地方連住好重既嘢,頸,同4個關節(2x肩關節,2x髖關節),中間係個身體,當你一郁,就要搵出相對既關節,連住相對既身體,加上手手腳腳頭,構成唔同既平衡,我暫時連relevé都久唔久會向後咗.

阿爸阿媽細佬我愛你地

老豆間鋪,終於搞掂,叫做搞曬咩臨時買賣合約,等文件處理好,同完成埋個交易,先叫保得住間鋪.呢單嘢搞到老豆,發誓以後都唔再租鋪,一係就唔開分店,一開就一定要買斷個鋪位先開,我都好明嗰種壓力,一間鋪揹住起碼30個家庭既生活,業主上年簽新租約話要加租8成,好啦,計過,呢間鋪當係白做,靠其他分店生意頂住,同埋呢間總鋪真係好多夥計,年尾流流老豆又好人唔想幾十個家庭過唔到年,明屈都唯有焗住簽,結果嗰頭簽完租約,轉頭走個新業主嚟,話賠12個月鋪租要我地30日內走,然後再暗暗咁表達,如果玩到上庭,佢地集團成班律師仔會好得閒招呼我地,結果就係咁,我老豆把心一橫問對方放緊幾錢,佢願意比多少少買埋個鋪位,總之最後都係錢問題,肯賣個鋪比我老豆,不過貴過市值2成,同埋要喺14日內比大訂同搞文件嘢.

喺我老豆做出一連串衝動既決定之後,平時又好人又洗腳唔抹腳既佢,發覺原來1個月內,係冇可能有咁大份現金流啦,加按埋住緊層樓,再賣埋間舊樓,距離個鋪價都仲差好遠,如果就咁搵人買我地間屋,又冇可能咁快成交到,結果就直接賤價叫銀行賤價收咗佢直接拎錢舉去比個鋪位.

女人睇錢好著緊,我阿媽第1時間都有發癲,貴買平賣,一來一回蝕好多,不過佢都知老豆份人,不嬲都係咁,雖然頂住頂住,咁都要吞落肚.我明,我真係又好明,我阿媽有幾愛我老豆,我好感受到嗰種愛,佢生細佬前,成日都話,我出世嗰時,佢要幫老豆手,冇咩時間照顧我,到咗我而家都15,6歲,覺得我跩跩地,佢都有好大責任,所以佢好開心而家終於捱到可以全職湊細佬,點知上年細佬半歲多少少,阿媽又要再落鋪幫手,搞到要我照顧細佬,我好體會到阿媽嗰種無奈...老豆我冇得揀,但老公係阿媽佢自己揀.

我好開心,屋企發生咁大件事,佢兩個都只係嘈過1日咁大把,做女既,其實好感動,我真係見過啲親戚,為咗去唔去旅行,2公婆嘈足大半年,又有啲親戚為咗婆媳關係鬧足咁多年,真心真心覺得我阿爸勁有承擔,我阿媽勁愛我阿爸,我會好好比心機溫書做功課,照顧細佬㗎嘞,你地既愛真係感動到我.

我支持你啊!阿爸!我愛你啊!阿媽!

仲有我勁鐘意你啊~~~!細佬,呢半個月你開始痾一舊舊既屎,家姐唔駛洗你啲人奶屎,已經好開心㗎啦!快啲爬爬快啲自己企企快啲自己行行快啲食多啲嘢快啲叫家姐....

你地所謂上一代都已經唔係上一代

屌,上一代上一代...板間房?而家2017年邊撚個女個阿爸阿媽聽到個女話結婚後要住擋房,會係話「冇所謂,捱吓啦,阿女」咁?

社會太多「正撚量」

尋日2跳,1個13歲,1個16歲,見到咁既新聞,個心唔會安樂得去邊....

過年啲3姑6婆親戚先喺度寸,話咩而家啲後生,咩都捱唔住,比間名校佢個小朋友讀,又話讀唔掂,跟唔到,我聽得明既,寸緊我讀Band3尾,然後又喺度講,咩唔係名校既小朋友唔明㗎嘞,又冇競爭,返學都開心啲,不過自殺都係有錢人家既小朋友,因為父母冇時間理佢地.

我嗰日聽到,個心都已經屌你個閪,講埋曬啲咁陰質既說話,仆街,點之1個禮拜後,2跳都係屋村...

屌,自殺邊有分有冇錢同讀書好唔好,有啲人天生係悲觀啲,好似我咁,然後呢個世界死都要逼我地走去樂觀,走去開心,然後話尻我地唔撚正常,屌,你地係咪癡撚線㗎,我未去到想去自殺,但我超明走入去既感覺,走入去,唔係一次半次,唔係你搞咩咩咩活動,物物物訓練,就可以趕我地出嚟.

成撚日用個「唔正常」既角度入我地,你班樂觀人玩撚曬算吧啦.

我上次真係好想死,係我練舞練傷腳,入唔到某個團體,我鐘意我阿爸同我阿媽比我去唔開心,嗰次我真係勁鐘意佢地囉,陪我唔開心,屌,點解呢個社會咁多「正撚量」唔撚比人唔開心?我真係唔明...

鄰居

大大話話我諗都有10年,冇喺呢間屋住過,甚至乎冇返過嚟添,隔離屋既兩公婆我記得,佢2個女都同我差唔多大,然後樓下6樓有個婆婆,佢話認得我,不過我唔記得,我諗我搬走嗰時,佢都仲係個C9.

呢棟大廈就好似條村咁,管理員好似個村公所阿伯咁,啲婆仔啊,伯伯成日坐樓下打牙骹,8呢樣8嗰樣,後生既就禮貌上叫一聲乜生,然後一支煙咁走咗去.

然後村公所先生就要處理唔同人既問題,好似我屋企咁,搬咗返嚟2日,阿乜生就話我地知,我地樓下懷疑我地滲水,然後其實我地個天花板都花花地,結果我老豆又同返阿乜生,叫樓上業主Check Check.

講起漏水,真係都幾麻煩,初先我老豆都怕麻煩,諗住快快手,請以前幫手裝修既師傅,幫我地Check吓我地啲水喉,同埋地板係咪真係漏水,點知幾個師傅見咁係單嘢,個個都話唔得閒,呢啲就係所謂人情啦,有夠凍啊.

最後問吓阿乜生,佢又真係有好介紹....

對比起之前住既地方,呢度可能戶數少啲,定係唔知點樣,真係大部份人入電梯都會打吓招呼,然後走次有個伯伯,其實我唔識佢,不過入電梯有點吓頭咁,有次喺大堂問我,可唔可以幫佢睇吓張信定係咩講乜,原來佢前幾日喺廣華入急症,未比錢,咁佢嗰張紙寫住話要返廣華交錢,見佢行路仲要揸拐杖,最後我仲幫佢去廣華交返錢添.

呢種唔算多既人情味,至少有囉,係真係有股好難形容既味既.

呢排日日比細佬整醒

舊屋間眼鏡房係一樣大,阿爸阿媽間房因為有張雙人床,我嗰邊就係單人床,所以細佬張BB床自不然就放我嗰邊,而家佢地就有覺好訓,我就成日半夜,要抱返訓細佬,有幾晚挨住牆,抱住細佬就咁訓咗,最後就變成我將細佬擺喺我隔璃訓,原本諗住慳返,唔駛起身過BB床抱佢起身,點知,而家朝朝都比佢搞醒我,尤其是之前放緊農曆年長假,唔駛早起身,日日都好似訓無夠咁.

我唔係好記得細個既嘢,但我記得我細個都係成日要等大人起身我先起身,嗰種悶定係要等大人既感覺,都仲有少少印象.

湊細佬呢個過程,雖然真係好辛苦,但真係都係個奇妙既旅程.

好想學唔同既嘢

已經唔記得,對上一次係幾時,做曬放長假既功課,記億中,好似已經係小一嗰時既事.

其實我啲數同英文,基本上已經屎到唔知點追,不過我諗,真係大人所講-「比心機」,除咗咁樣,我已經唔知有咩可以做,補習我諗等我追返上正常既程度,先再問吓可唔可以比錢我去補習啦,而家淨係比錢我去學芭蕾舞,我知道對阿爸阿媽嚟講,已經係好大負擔.

早幾個月,Miss彈咗單平面廣告,搞到尋日先影,Call Time朝7晚10,一個Pirouette就影咗千幾張相,然後得幾張用得,我真係超唔鐘意比人影,成日都唔知上一批有咩唔滿意,然後又要影過一批.之後同阿攝影師哥哥傾吓計,佢話都有啲Job啱我影,問我有冇興趣,我話佢喺度氹我妹妹仔,同埋我諗除咗Miss介紹既Job之外,我屋企唔會比我喺出面影相.....不過我同佢講,有興趣學影相,問佢有冇咩可以比我去學,然後哥哥仔話,都可以教吓我執相既....聽住先,抄咗佢牌,遲吓搵佢啦,唯有.

磅洗啲衫縮曬水

搬返細個間舊屋之後,間屋太細,唔夠位擺洗衣機,所以除咗細佬啲衫之外,我地啲衫都係拎去磅洗,唔知係咪以前間屋部乾衣機,我地唔會用高溫乾衣,但洗衣鋪要慳時間,所以我諗會用比較高既溫度整乾啲衫,拎完返嚟啲衫一來硬,二來我發覺啲衫有少少縮水,最明顯既,係我發覺我啲底底縮咗水,而家成日條底底會「Zip」咗入個PatPat入面,之前完全唔會咁樣,同埋因為呢次搬屋,因為大屋搬細細細屋,好多衫都唔敢拎過嚟,底底我都只係拎咗5條就算,我仲諗住拎最靚靚嗰5條,即係有啲細個阿媽買落,好似啲婆仔底底我就梗係唔拎啦,點知呢次就出事嘞,5條都係細細條,當然又唔係T-Back啦,但布少少既款,而家洗一洗,撞鬼囉,再細咗.

呢2日襯未返學,要快啲去入返幾條婆仔底底先得,有咩好選擇呢?UNIQLO好無呢?都要成$80蚊條,又唔敢買出面平嗰啲,驚料差著焗住仲衰.

多謝爹地媽咪

大年初一,難得阿爸阿媽唔駛開鋪,一早就煮早餐比佢地食,然後成家人去拜年.

我好鐘意呢個屋企,雖然我地要捱吓,雖然我而家要負責家頭細務,雖然我要湊8個月大既細佬,不過我好鐘意呢個家,即使我地好少時間相處,但我會好好比心機,生生性性做返Form4學生要做既野,我會湊好細佬,我會好好地生活,多謝爹地媽咪好辛苦做嘢養育我地.

成個鐘去拗呢啲無聊嘢

「我唔明點解你契哥要攬住你行囉!」
「吓,咁頭先人多,佢驚我比人撞親掛,況且只係搭,唔係攬囉.」我捉住阿邊個隻手,放落我條腰度.咁先叫攬囉.」
「咁你拖住我都得啦.」
「我本來拖住你,咁逼吓逼吓先鬆咗手,之後阿契哥搭住我我都唔知.」其實我知囉,我知佢係咁掃我條添,不過我都要打咗佢幾拳,我真係覺得大家係「打打鬧鬧」嗰種玩囉.
「我見到你好似翹住佢添.」好似即係睇得唔清楚啦.
「冇啊,你睇錯咗.」我真係覺得好煩,就算拖住都唔係代表我鐘意第2個囉,我同我啲Friend都係翹住出去行㗎啦.

阿邊個對我好好,我明,但我真係好似湊細路咁,屋企已經要湊住細佬,出去諗住透吓氣,得嗰2個鐘,我地用咗成個鐘去拗呢啲無聊嘢.

而家我得你一個男朋友

多謝阿邊個,喺我經歷咁多嘢既時候,可以繼續陪住我,希望我地可以一齊比心機考好個DSE.雖然你有時真係好煩,但我知道係出自你既愛,當然我既任性,搞到你對我建立唔到應有既信心,但你信我啦,我真係同第二個拍拖既話,我會同你講.

但,而家我得你一個男朋友.

Gmail+Evernote

自從上個月生日嗰日唔見咗部電話,入唔返之前既Email同FB,同所有要登入既服務之後,我真係好驚再嚟一次,結果呢次,叫老豆出張上台既Sim卡比我,起碼我個電話號碼,唔會因為我跌咗張Sim就拎唔返,以後都唔敢用儲值卡既號碼,去登記咩Email或者Facebook之類既服務,堅唔敢再用.

然後,又,自從上次咁樣搞到我冇曬啲Acc.之後,我就不斷搵方法記好啲密碼,因為咁,我搵吓搵吓,又發現有隻叫Evernote既服務,用嚟做筆記都好好用,而家做功課溫書都係開住Evernote做,不過要慢慢諗吓個Filing System點Set先,佢個筆記簿同Tag可以分做唔同既System拆開分類,不過用多陣先再仔細諗諗點Set先得.

我唔知之後會點

今日終於清曬所有嘢,全屋所有嘢都比人搬走曬,下星期過完年,銀行上嚟收樓,對方應該會更加方便.

我小學嗰時都經歷過一次,由細到大,阿爸成日都睇住鋪頭,無啦啦有日阿媽同我講,話老豆間鋪冇咗,佢會休息吓,不過我地就要慳啲駛,要搬去細啲既屋,我啲玩具只可以留返最鐘意既搬去新屋...

細個傻更更但都有少少驚,唔知之後會點...到而家,屋企第2次唔掂,而我,亦經歷過無數次「唔知會點」之後,其實都真係唔會再驚,盡量幫手湊住細佬,打理好屋企,安排好送走曬啲傢具,電器,衣物,然後去新屋嗰邊幫手,準備好所有嘢,比阿爸阿媽放工即刻可以返屋企休息既地方,我冇時間去徬徨,冇資源比我去驚.

細佬而家先得8個月,我唔知之後會點,但我知道今日要幫佢換片,餵佢食嘢,抱佢訓覺,陪佢傾計,我知道我要好好幫爹地媽咪手搞掂屋企既嘢,尤其是而家學校假期,幫得幾多得幾多.

呢幾年我轉3間中學,間間都係全港Band3排尾10既學校,BabyKindom啲哥哥姐姐話我乖,不過真係自己知自己事.

我唔知之後會點,不過唔知係咪有咗細佬之後,再加上屋企請唔起姐姐,我要照顧佢開始,我覺得我唔少既轉變,睇住屋企多咗個小生命,我好似都有新既旅程,轉咗而家間中學讀Form4,係我做咗中學生之後,第1次坐定定喺度做功課,右手仲要抱住細佬整佢訓.

我唔知之後會點,但我鐘意我而家既轉變.

老豆我支持你啊

今日開始有人上嚟搬嘢走,睇住啲家當比人搬走,我諗阿爸阿媽都冇眼睇了.

好多人同我講,話網上就咁送贈物資,會有人轉賣出去,我都明,不過得幾日時間,我又真係唔夠時間逐個問佢係咪自用,點證明,或查佢以前有冇拎完野又再賣出去咁.

然後我覺得我好開心,我跳舞既衫,可以比到好多唔同既人,有小朋友,有同我差唔多大既,因為咁樣轉送啲衫既關係,有可能因為咁樣做朋友都唔定.

其實睇住老豆,而家面對「所謂」既生意失敗,我冇唔開心,因為老豆真心想班伙計有工開,情願捱貴租都繼續做,情願自己甩咗層樓,準備筆錢預備幫個鋪位交租,佢亦都好有信心可以捱過呢關,所以我阿媽同我呢個做女既都撐我呢個老豆,加油啊,老豆,我愛你,無論你有咩事我地都會喺你身邊支持你啊.

Baby Kingdom比嘢人真係好方便

尋晚Post咗批電器上Baby Kingdom,真係好多人要,之前冇諗過咁麻煩,同埋經佢個PM真係都幾麻煩,如果直接可以落埋個Whatsapp我就方便啲,不過咁,我覺得都比我預期快,可以散曬啲野出去,都算幾唔錯既平台.

只不過我處理得唔係咁好,同埋批電器真係好多人想排,搞到好似好多人好失望咁.

有冇人要以下電器

我屋企因銀行收樓,急住唔要家庭電器,傢私,阿爸阿媽叫我上網搵人要批家電家具,比有需要既人可以用返批電器,問過幾間慈善機構同社企,都因為年近歲晚趕不及收. 

暫有以下電器送贈: 
1.MIELE洗衣機 W5824 (2015年購入) 
2.MIELE乾衣機 Miele T8402 (2015年購入) 
3.MIELE蒸爐 DG 6010 (2015年購入) 
4.Miele吸塵機 S5281 (早過2015年唔確定) 
5.Sony電視 KD-65X9005B (2015年購入) 
6.日立雪櫃 R-S700P2H (2015年購入) 
7.Panasonic空氣淨化機 F-VXK70H (2015年年尾購入) 

基本上全部電器都好新,呎吋請於官網搵,因為太急未得閒影相,如果真係要既話我會影相返相,我地2月初要搬,最理想係1月31日要搬走所有電器,全部自取. 

另因我細個學跳舞,阿媽買左好多芭蕾舞衫及鞋(女裝小童至XS及S碼),大多數係Wear Moi, Grishko, Freed of London呢幾隻既牌子,如果啱既可以要埋. 

有興趣可聯絡我
電郵zoe.chaknganshek@gmail.com 
或 
Whatsapp Only :68915977

#齊顏石 #顏石部落 #Zoe Shek #zoe.chaknganshek@gmail.com

搵人要曬我啲衫同屋器啲電器

幾乎肯定,搬屋之後,就會冇咗洗衣機,乾衣機,然後差唔多所有電器都唔要得,因為新屋放唔落.我個衣櫃會得返原本5分之1,有好多衫都唔可以要,然後第日洗衫只可以拎去磅洗,我而家只係諗住留返幾套跳舞既衫,細個著嗰啲唔捨得,因為全部都有牌子,件件都有汗水同淚水喺入面,不過新屋地方淺窄,著唔到既一件不留,然後幾套運動衫褲,再加幾套出街衫,裙,留一兩件大摟,同埋啲校服,其他全部都唔要得,真係擺唔落.希望過年嗰時,阿爸阿媽唔駛開檔,咁大家輪流湊細佬,我就可以有時間執好曬啲唔要既野...諗諗吓呢幾年影影埋埋,有好多私影影完留低既衫,成大堆衫,又要搵人要,好麻煩好好好好好麻煩.....
#齊顏石 #顏石部落 #Zoe Shek #zoe.chaknganshek@gmail.com

現實世界唔會有人同你玩玩吓

我唔敢講WHF真係好好,不過如果只係For我既話,我又覺得OK,至少我而家唔會日日走堂,同埋雖然大家都係Band3尾,但係比起之前,而家有得比我揀,勤力啲,下年可能比我上到去好啲既班,講真,我好清楚,亦知道點應付「唔同」既同學,或者咁講,我好識得點樣去避免,或者化解麻煩,但係,玩咗3年,轉咗2間Band3尾既學校,真係咩都厭,去到邊間學校,都係遇到類似咁既人,角色完全一樣,只係飾演角色既演員唔同,對於我呢個,走堂走到厭既人嚟講,有機會比我揀既話,我覺得今年Form4,真係係一個界線,要自己好好地咁去計劃吓將來,當然,將來係乜,邊Q個知,但呢排經歷完老豆就嚟比人申請破產,我仲要幫手湊埋幾個月大既細佬,呢個現實既世界,唔會有人同你玩玩吓,冇錢,就ByeBye啦,養唔起個小朋友,係真係會死人. #齊顏石 #顏石部落 #Zoe Shek #zoe.chaknganshek@gmail.com

先洗未來錢

先洗未來錢,下禮拜先過年,利是錢未到,已經上網訂咗呢條褲.

#齊顏石 #顏石部落 #Zoe Shek #zoe.chaknganshek@gmail.com

邊度可以搵人拎走啲舊物件

過埋年要搬屋,因為少咗工人姐姐,所以會搬間再細啲既屋,下禮拜過年,呢2日要大掃除,好多嘢都會唔要,定係搵人要咗啲野好呢,邊度可以搵人要好呢?但真係好過掉Wor. #齊顏石 #顏石部落 #Zoe Shek #zoe.chaknganshek@gmail.com

Clash Royale

因為阿邊個既關係,呢排迷上咗玩Clash Royale,上一隻沉迷咗既 Game係Line Ranger,但Clash Royale無疑係可玩性更高既,因為佢個相剋既機制,駛到我呢啲冇貨金既窮人嚟講,可以靠對每張卡既熟悉度,去搵出一線生機.

暫時都係靠三隻埋身既卡去做攻堅,箭同火球就去打對面既卒仔散兵,之後就加幾張卒仔散兵做掩護,要打得好,真係要操,不過讀書加湊細佬,真係唔多夠時間打囉. #齊顏石 #顏石部落 #Zoe Shek #zoe.chaknganshek@gmail.com

BLW既成果

今晚阿媽嗰邊團年飯,我帶細佬做代表,佢今晚真係好合作,竟然成餐飯食曬我帶過去既菜啊紅籮蔔同麵包,條友喺屋企都唔會坐得咁耐,同食咁多嘢,但反而今晚坐足成個幾鐘,勁叻叻囉.

我覺得同佢行BLW呢套方法,今晚算係成果,起碼都叫坐定定,同埋一路自己食食食,我唔知人地8個月既BB係點,但我真心覺得細佬行BLW,對佢同我都好辛苦,好似我餐餐都同佢執返地下啲食物,餐餐都要換衫,佢又成日都食到嘔,同埋最緊要佢轉食固體食物,真係食得唔多,所以又要餵多幾餐奶....做既嘢真係多好多.

至於親戚讚唔讚佢,其實我真係唔多在意囉! #齊顏石 #顏石部落 #Zoe Shek #zoe.chaknganshek@gmail.com

講過好撚多次,人地要追我,我真係冇計

又係咁,一係話我同啲同學玩得好埋,一係就話我唔著打底褲...係咪癡線㗎.....我好明,你真係好愛我,但咁樣我真係好頂唔順,我就快透唔到氣嘞,講極都唔明每個人都需要空間.....我唔覺得我拖一拖個同學會點,少忽肉?等於我對人地有嘢?喂,講過好撚多次,人地要追我,我真係冇計,拍拖要有信任,咁唔信我,我覺得真係好難拍落去. #齊顏石 #顏石部落 #Zoe Shek #zoe.chaknganshek@gmail.com

做生意既原罪

就嚟過年,不過屋企檔生意好差,都唔知過唔過到年,不過生意差都唔緊要,加租一倍就係個重點所在,之前10萬租,但上年12月開始就加到18萬,嗰班話自己代表商界既議員,一味就話人工高,最低工資又唔肯上調,因為生意難做,但從來就唔去反映個租金問題,好似我屋企檔野咁,就算所有伙記加2成人工,都係2成既增幅,但個租金成本係80%上脹.

所以上年年底已經炒咗姐姐,阿媽又要落鋪幫手,我放學就要幫手湊細佬,今年到底咩事啊,好難捱啊. #齊顏石 #顏石部落 #Zoe Shek #zoe.chaknganshek@gmail.com

行乜鬼BLW

我阿爸阿媽好想我細佬行BLW,話我去到6歲都要佢地餵,佢地唔知邊度聽返嚟,話外國好興BLW(Baby Led Weaning),就因為咁,我就要每晚諗整咩比細佬食好.

細佬對紅籮蔔,蕃薯,薯仔,青椒,通粉,飯團,西蘭花,菜心,自製南瓜曼頭,麵包咩都冇興趣,但係咩BB手指餅啊,星星餅啊就係咁食,再咁落去我買返水果蓉比佢食就算,次次整完啲野又唔食,餐餐啲野淨係玩,整爛曬食完飯仲要幫佢換衫,整返乾淨張High Chair同塊地,真係仲辛苦過餵粥仔,佢兩個日日掛住看鋪,但又成日睇電話,然後話人地話咁咁咁好,物物物好...

個個小朋友個情況都唔同,我覺得BLW係有佢既好處,但根本又唔係個個BB適合囉,至基本個BB係鐘意食野先囉,我細佬都唔鐘意食野,得個搞字. #齊顏石 #顏石部落 #Zoe Shek #zoe.chaknganshek@gmail.com

真係唔好亂搞

講咩唔好婚前性行為,咩唔好搞野,咩要戴套,咩唔好比人中出,講咁多都唔及,叫班細既幫手湊1個月半歲以下既BB,家計會應該會得閒好多.

而家每日放學,返到屋企就要幫手餵奶,餵完奶就盡量抱到細佬訓,如果佢訓咗,我就可能可以做個幾鐘功課,如果唔訓,我就要諗野同佢玩,可能陪佢爬爬,或幫佢練企企,之後又要預備整南瓜蓉啊,紅籮白粥之類,準備夜啲比佢食,之後仲要幫佢沖涼,換尿片好少事,開咗大就好大鑊,因為主要都仲係食緊人奶,所以啲便便好稀,次次開大要洗Pat Pat.

我決定第日有邊個話忍唔住要搞野,幫我湊細佬1個星期先再問我啦. #齊顏石 #顏石部落 #Zoe Shek #zoe.chaknganshek@gmail.com

FlexWash™ + FlexDry™

不嬲都好憎三星既野,只不過呢次佢出部啞黑色既洗衣機,又真係好型,其實如果成屋既電器轉曬啞黑色,真係好正,呢部野仲要識分兩機衫去洗......

#齊顏石 #顏石部落 #Zoe Shek #zoe.chaknganshek@gmail.com

人地打飛機會諗起我關我撚事咩?

阿邊個今日話我唔夠坦白,我頂佢個肺啊,每個人都有每個人既陰暗面,何苦總要拆穿塊面紗呢?唔通我要成日問,喂,你打飛機有冇幻想過同邊個邊個,屌...

人地點諗我,點幻想我,唔關我事㗎,屌,想我點? #齊顏石 #顏石部落 #Zoe Shek #zoe.chaknganshek@gmail.com